MAMPARANGEHON PARANGE HATIURON
EFESUS 5:8-14
1. PATUJOLO
Surat na tinongos ni Apostel Paulus tu huria Efesus, di surathon uju di bagas hurungan ibana di huta Rom di taon 62 M. Ndada songon alus ni parsualan surat on di tongos tu huria Efesus, alai songon patuduhon parbue ni ngolu partangiangon na marsigorgor do di roha ni si Paulus. Hatihai di Efesus, torop dope halak na marsomba tu debata sileban (dewa) na margoar Artemis (Ulaon Apostel 19:35). Debata Artemis on ditanda jala dihaporseai songon debata na mangalehon parbue ni bortian (dewi kesuburan). Mansai gogo dope pangkorhon ni parsombaon tu debata Artemis on di luat Efesus. Alani i boi do gabe tarunjun nang halak Kristen di Efesus gabe mulak muse marsomba tu debata Artemis i. Asing ni i, disomba halak Efesus do nang Kesar songon tudosan ni Debata. Nuaeng on, Efesus ima sada sian luat na adong di bangso Turki, kota Selçuk, Provinsi Izmir.
2. NA HOLOM DO HAMU NA JOLO, ALAI TIUR NUEANG DI BAGASAN TUHAN
Diboto jala ditanda si Paulus do ise halak Kristen na di luat Efesus na jolo. Halak na di bagasan haholomon do nasida andorang so mananda Kristus Jesus. Alai dung pajumpang nasida dohot asi ni roha ni Kristus, gabe tiur ma ngolu nasida. Sian on tarida, ia halak naung dibagasan Tuhan Jesus ndang sai manontong ngoluna di haholomon, alai na mangerbang jala lam tu ulina do ngolu ni angka na di bagasan Tuhan i. Najolo halak Efesus marsomba tu debata Artemis dohot tu Kesar, alai anggo nuaeng holan tu Debata na mangolu i nama nasida marsomba. Sude do jolma adong hian parngoluon na buruk na jolo, alai dung ditanda Tuhan i jala dijalo asi ni roha ni Kristus gabe ditadingkon ma ulaon dohot parngoluon na buruk i, gabe dituju ibana ma ngolu na marhaimbaruon.
Halak na mangolu di bagasan Kristus ima halak na berproses manang na tongtong pahusorhon pardalanan ni ngoluna. Lam tu denggan na do haporseoan, holong, pangkirimon ni halak na mangolu di bagasan Kristus i. Songon dia ma asa boi jumpang na songon i, ima molo rade na porseai manadingkon angka parange na buruk i. Paulus sandiri na jolo andorang so gabe parbarita nauli, sahalak na garang do paburu-buru na porsea. Tajaha ma jo Filipi 3:4-14:
3:4 Adong do nian nang di ahu sipangasahononhon di daging. Ai molo dirimpu deba, adong sipangasahononna di pardagingon, nda lam ahu ma nian!
3:5 Tarsunat di ari paualuhon do ahu, na sian bangso Israel marga Benjamin, halak Heber, tubu ni halak Heber, halak Parise mangihuthon patik i.
3:6 Garang do rohangku mangalele huria i, so hasurahan di hatigoran na sian patik.
3:7 Alai naung paruntungan hian di ahu, harugian do i hujujur ala ni Kristus i.
3:8 Saluhutna do tahe huetong harugian tumimbangkon hamuliaon ni panandaon di Kristus Jesus, Tuhanki. Ala Ibana huseangkon saluhutna i, jala orbuhorbuk do i huetong, asa huomo Kristus,
3:9 asa di bagasan Ibana ahu didapot, unang ma marhatigoran sian patik, tung sian haporseaon di Kristus do, i ma hatigoran na sian Debata, na marojahan di haporseaon,
3:10 asa hutanda Ibana dohot hagogoon ni haheheonna i, ro di hasasaor tu angka haporsuhonna, di na gabe sapangalaho ahu dohot Ibana di hamamatena i;
3:11 anggiat sahat ahu tu haheheon na sian angka na mate!
3:12 Apala naung sanga hutangkup i manang naung gabe sun denggan; alai sai hueaki do, anggiat tartangkup ahu i, songon naung tinangkup ni Kristus Jesus i ahu.
3:13 Ale angka dongan, ndang hurajumi diringku, naung sun hutangkup i.
3:14 On do tahe: Huhalupahon na di pudingku, hueaki angka na di jolo. Dompak pandang i do hupuspus, dompak upa hamonangan na sian panjouon ni Debata sian ginjang, di bagasan Kristus Jesus i.
Dung pajumpang dohot Kristus, angka naung nietong paruntungan hian gabe harugian do muse. Hauliaon ni ngolu portibi gabe songon orbukorbuk nama dung taomo Jesus Kristus. Jala ala ni i do barani hita manghalupahon na di pudi i, huhut mangeahi na di jolo i. Ima pangarimpunan ni ngolu na marhusor, na dinamis, na lam tu ulina, ala mangolu di bagasan Tuhan i.
3. MARPARANGE SONGON ANAK HATIURON
Anak hatiuron dipangke dison martudutudu tu halak Kristen naung mangolu di bagasan holong ni roha ni Debata. Baliksa anak haholomon ima angka halak na mian di duru ni Kristus, na mian di bagasan dosa dope. Na maralo jala marasing do anak hatiuron dohot anak haholomon. Di 2 Korint 6:14-18 didok:
6:14 Unang saauga hamu dohot angka na so porsea! Ai aha ma pardomuan ni hatigoran dohot na so uhum; jala aha do hasaoran ni hatiuron dohot haholomon?
6:15 Beha ma domu Kristus dohot Belial; aha ma hatopan ni na porsea dohot na so porsea?
6:16 Tung olo ma mardomu joro ni Debata dohot angka ajiajian? Ai joro ni Debata na mangolu i do hita, songon na nidok ni Debata: “Naeng di tongatonganasida do Ahu maringanan jala mardalani, gabe Debatanasida do Ahu, jala nasida gabe bangsongku.”
6:17 “Dibahen i, ruar ma hamu sian tongatonganasida jala paholang hamu ma dirimuna, ninna Tuhan i; unang ma jama hamu na ramun, asa hujangkon hamu!”
6:18 “Jala gabe Ama ma Ahu di hamu, jala hamu gabe anak dohot boru di Ahu, ninna Tuhan, Sigomgom parluhutan.”
Sian ayat na di ginjang i, nunga taida diama pangalaho anak hatiuron dohot pangalaho ni anak haholomon. Jala naso adong pardomuan ni na tiur dohot na holom. Laos ido nang na
taida di ayat 9-13 sian turpukta on, taringot tu parange hatiuron:
1. Parange anak hatiuron ima parange na patuduhon jala patubuhon angka habasaon, hatigoran, dohot hasintongan.
2. Parange anak hatiuron ima parange na manjamothon jala na manangkasi angka dia ma dalan na hombar tu lomo ni roha ni Tuhan i. Sai jotjot do hita mangido di tangiangta “togu hami di dalan lomo ni rohaMi”, alai maol do hita mangalehon sude gogonta nang pingkiranta laho manangkasi parniulaonta asa hombar tu lomo rohani Tuhan i.
3. Parange anak hatiuoron ima parange na so kompromistis (na so mangalehon nanggo saotik pe rohana) tu hajahaton. Lapatanna parange anak hatiuron ima parange na tegas, ndang plin-plan. Na sala i ingkon tongtong do sala, jala na tingkos i ingkon tongtong do tingkos. Olo, anggo olo; ndang, ia ndang! Nasa na ganda sian i, sian na jahat do i! (Mat 5:37). Na so jadi saor angka anak haituron ni tu angka ulaon haholomon i.
4. Mangasahon sondang na sian Kristus i, ingkon marhamonangan do parange hatiuron i sian parange haholomon. Sondang hatiuron i ma na manorangi sude angka haholomon na di tano on. Tusi do hita dijou, gabe panondang ni portibion (Mat 5:14).
Pdt. Aldemak Simanjuntak
